[游记]国庆长周末的多伦多游记(之三)

星期日 (七月一日)，天晴。本來帶咗大毛巾同拖鞋，打算去安省遊樂宮行下，睇齣闊銀幕電影兼喺果度嘅水上樂園玩半日，但我哋臨時改變主意，唔去；一來，當日氣温只得＋幾廿度，玩水似乎凍咗 d；二來，果日係正正假期，梗係有好多人入場去玩，你話啦，要想玩嘢 (滑水梯)，排隊排成大半個鐘頭先輪到玩果两三分鐘，有乜癮？都係等下次長週末再嚟多倫多果陣先去 (八月第一個週末，公民節)。我哋决定又去尼加拉瓜瀑市區，雖然啱啱先喺上次五月份維多利亞日去過，但呢的咁出名嘅旅遊區係百去不厭。我哋喺八點幾落宿舍樓下間食堂食早餐，話有免費早餐供應，不過，我哋預咗 [冇乜嘢好食]。呢間宿舍大樓有成＋層高，每層有成百幾間房，呢個長週末好旺，差唔多住滿人，主要係年青人旅行團。早餐係麵包或者麥餅，自己整 toast，有咖啡，荼或果汁水，重有麥片加奶，蘋果同橙，可以任食，我哋對於早餐無所謂，總之食飽就算啦。

我哋喺十點之前出發當日嘅活動。先揸一個鐘頭車，去那個特大室內跳蚤市場，睇下有乜好買，呢個跳蚤市場有成百幾檔，結果買咗對跑鞋同埋一個 game 俾亞仔，老公買咗一盒一百張DVD空碟用嚟燒錄嘢；我買咗件100絲質春褸；幾樣嘢嘅價錢都好相宜，比外邊平少少，去跳蚤市場買嘢係要講啱機會，上次我哋就冇買到嘢。行咗個幾鐘，將近＋二點，就上返上 highway，繼續去尼加拉瓜瀑布區，我哋一心係想去果度間萬佛寺睇下，呢間寺好大規模，有幾座 [建築物]，最高果座有成七八層，裹面供奉咗好多大大細細嘅佛像，可能冇一萬座，但會有千座。萬佛寺座落喺河邊，對正瀑布，呢間寺當然係由中國人起的，原來已經有六年，不過好似喺呢两三年先成為景點，我哋以前經過好多次，都唔見有人喺果度，以為唔淮人入，所以冇駛入去。

由多倫多去尼加拉瓜瀑布區，幾時都係交通繁忙，因為果度除咗係旅遊勝地，重係美加邊境，两國的車都排長龍等過關，交通雖然忙，但 d 車仍然可以一路揸到去，最多係两個鐘頭就到，點知，果日 [失晒預算]…. (想知下文，我明天繼續寫，因為我想睇一集<溏心風暴>，然後瞓覺)。

新增回應