|
July 23 力化與琴之長洲遊記 這個嘛~今日天氣好好~仲係大暑~嗚哈哈哈~~~
…
今朝8:00左右俾老豆叫醒~但係之後都係瞓到9:00先起身~本來想搭巴士去中環~但諗諗下又可能塞車~結果都係搭地鐵~10:00出門口~
仲有頭條日報派~我好似攞到尾二嗰份~之後搭MTR有得睇報紙啦~去到中環有都市日報~之後行去香港站A2出口喥等~我到咗之後睇都市日報~
今日都市日報有講Stella So畫嘅嘢~有幅藍屋喺喥~我搣咗嗰一張出嚟~之後阿琴都到咗~我哋一齊行去5號碼頭~原來阿琴真係未去過長洲~
之後行過6號碼頭外有回收桶~我掛住講嘢唔記得揼啲報紙入去~之後趁未夠鐘返轉頭揼~揼完之後見到一個收紙皮嘅阿婆行過 …
之後入閘~冇幾耐上船~喺船上見到戴住紅帽嘅澤哥孭哂架撐喺碼頭跑嚟~之後我叫佢~佢上船之後走上嚟~我都估到會俾我見到入聖樂營嘅人~
但澤哥卻係即日來回嗰隻~日日如是~依家我知點解佢唔住埋喺嗰喥啦~之後仲有阿琴禽日喺大澳識嘅人~佢又係今日嚟長洲玩~真係神奇~
11:15開船~出面都幾涼~見到青洲燈塔~有理冇理連山頂上面嗰個疑似燈塔都影埋~架船12點幾到長洲~我哋落船之後三個人一齊去食嘢~
之後去澤哥介紹嗰間茶樓食嘢~我同阿琴都唔係好清楚呢間嘢嘅模式~澤哥又叫我哋出去揀點心~結果我哋兩隻嘢企咗喺外面幾分鐘先知點樣~
攞咗5籠點心入去~之後叫多碗粥~食完之後都幾飽~之後澤哥話請我哋食~多謝哂~
…
13點幾走人~澤哥幫我哋影相~之後我見到又係入camp嘅人~包括CCC~之後我同阿琴向北行~阿琴沿路喺一間舖買咗頂帽~
寫住GOLFWORLD~~~之後我哋去咗北帝廟(玉虛宮)先~嗰喥有印吸~仲有奇怪嘅山牆~好似係五岳朝天山牆~不過同西區魯班廟嘅五岳朝天好唔同~
佢係圓角嘅~但魯班廟係尖角嘅~之後影埋北社街嘅豫章草籚~佢都好有特色~之後喺附近北社三里租單車~之後走去搵天后廟~佢喺北帝廟北面~
見有條斜路就走上去睇下~佢喺老人院隔籬~影完之後落山~向南行~路過一個福德社稷~福德其實即係土地公~
…
之後去方便醫院~但我哋飛咗入大新街(其實係大新後街~我哋俾啲門牌呃咗)~去到盡頭之後係樓梯~我先去望下~
之後我哋鎖車喺樓梯前(真係感謝老細俾埋單車鎖我哋)~之後走上去~係方便醫院嘅側面~之後行去正面~佢原來對住一條斜路~影完之後走人~
去方便醫院隔籬間洪聖廟~方便醫院前面條斜路其實去到嘅~不過我哋唔知~同埋冇理由托埋架單車上樓梯嘛~結果踩去海傍街~之後鎖車~
我哋走上去~呢間廟又係有印吸~長洲有兩間廟有得蓋印~我都吸哂~
…
之後去中興街嘅大石口天后廟~之後去附近一個神秘石刻~佢刻嘅係我哋睇得明嘅字~所以應該都唔係好耐好耐以前嘅嘢~
個介紹牌話佢可能係記載咗一啲醫小兒疾病嘅藥方~去完呢喥之後諗住去東灣嗰邊~但係已經開始唔明地圖寫乜~結果都費事睇~
只係有個概念要向東行~但係啲小巷真係好亂~所以亂咁轉~結果我哋喺喥轉咗個圈~去咗大新街(今次真係大新街啦)~又見到方便醫院~
亦都俾我發現到方便醫院係有路去洪聖廟~~~但係都不枉此行~因為發現到大新街嘅舊路牌~仲係裝喺鐵架上嘅~喺香港依家剩返兩個舊路牌係咁~
而呢個路牌隔籬有一個碑記~好似係某一間貿易公司嘅嘢~但間公司喺邊我都唔知~之後走人~冇幾遠一條小巷角落有一塊半埋喺地上嘅碑~
見到嘅字有潮恵地三個字~地字下面好似仲有字嘅~不過睇唔到~
…
之後終於搵到東灣路~踩踩下見到警署徑~之後鎖車走上去~長洲警署都係歷史建築之一~影完之後踩返架車~之後去搵華威酒店隔籬嘅石刻~
呢個石刻就係法定古蹟~喺黑排路對上~阿琴喺我前面~佢唔知繼續沿大路踩~之後我飛咗入黑排路~佢之後要回頭入嚟~我先上去影石刻~
之後佢鎖完車上埋嚟~呢個石刻係古代嘅圖案~雖然風化得唔係好嚴重~但加咗個玻璃罩都唔係咁好~~~之後坐喺出面個涼亭透下~16:10繼續行~
今次去觀音廟~但最後都係冇去~我哋喺長洲醫院路去警署徑~又俾門牌呃咗~嗰條明明叫警署徑都可以寫咗大新後街出嚟 之後經警署徑去山頂道~放棄咗搵觀音廟~去關公忠義亭~沿路有福德社稷同長洲內地段界石~之後去到關公忠義亭~
其實都只不過係一個四角欑尖頂嘅廟啦~不過嗰喥有條鯨魚骨~仲有兩個六角欑尖亭喺後面~
…
影完之後沿山頂路去建道神學院~呢一帶都係兩年前聖樂營去過嘅地方~舊地重遊~~~去到有個女人問我哋邊喥有飲水機~
幸運地我雖然依家唔係入camp嘅但我話哂都嚟過~我話佢知一個兩年前嘅答案~但呢個答案到依家都冇變~之後我同阿琴扮探camp入埋入去~
見到一個我見過但唔記得咩名嘅人~打個招呼~我哋聽到啲人唱詩~之後落去飲水機斟水~個女人仲喺喥~佢可能第一次入camp~又或者根本係外人~
所以好多嘢都唔係好知~又嫌廁所污漕~不過佢都信得過我哋~之後走入廁所洗個面~個廁所又真係 出返嚟之後又見到澤哥~
…
去完建道之後繼續搵古蹟~去咗長洲官校~佢隔籬條樓梯(學校路)係我兩年前同芷蕙趕住入camp時行過嘅~托住個喼上樓梯的確刺激~~~
影完官小都差唔多準備走人~我哋兩隻嘢衝落山~之後見到第三個社稷~之後就踩返去北面還車~還完車17:05~我哋搭17:20慢船~
之後向南行返去碼頭~走咗入一間舖買嘢~我買咗個平安包電話繩~佢送埋扇~阿琴買咗啲乜我都係唔講~我哋飛入碼頭都仲係17:15~
上船之後又見到頭先見過嘅阿琴嘅朋友~之後坐佢哋後面~我哋兩個晒到黑哂~我個護腕印越嚟越明顯啦~~~
我真係要配過副眼鏡啦~個眼鏡鼻托今次仲唔見埋~~~
…
18:05左右落船~我哋去到香港站就各行各路~但我唔記得八達通負錢~去到巴士站等咗一陣車先記得~之後去地鐵站7-11入錢~之後搭692走人~
喺車上老豆同我講叫我自己食癲拿~之後落車去買嘢歸家食~食之前先過冷河~食完之後處理啲相~之後打咗篇咁長嘅日記 相聽日先~
今日Showhappy有返個版喺喥~但係問題仲未解決~結果我篇日記都仲未上載到~又係先放喺msn space~
…
|
