[游记]尼泊尔游记-第一天

December 01

尼泊爾遊記-第一天

終於知道著草嘅感覺係點 ---- o係半夜天未光5點幾嘅時候，街上只有數名晨運伯伯婆婆同一架架空的士經過，寒風凜凜，孭住一大一小行李，獨個乘坐的士飛奔去碼頭，唔係，打錯，應該係中環機鐡站與另外3位好友一齊搭機鐡趕往機場。

我地4個之中，我係第一個去到機鐡站，時間6點05分，當然致電其他幾位好友問其位置，都唔希望臨門撻Q。得知全部團友已經出了門，相信都應該可以順利成事。數分鐘後，齊人，速逃。去到機場，即刻排隊辦理登機同寄倉，然後嘆返個早餐。

話說回頭，由於之前嗰晚要做兄弟，所以返到屋企都半夜12點，咁尷尬嘅鐘數當然唔會瞓，好彩有足球相伴(有美女更好!!)。

食完早餐，都夠鐘上機。由於成晚無瞓，當然要喺機上叉電。我地搭泰航，因此班機會喺曼谷轉機，不過因為唔係全滿，所以可以霸住兩個位瞓覺。雖然唔算舒服，但都好快瞓著......不過係醒吓瞓吓、瞓吓醒吓.....好過無....

去到曼谷一落機就要飛奔，因為架駁機已經夠鐘登機，機門打開已經有工作人員拉哂橫額請願.....唔係，打錯，應該係接人去轉機。原來架駁機係九丈遠，坐車都要10分鐘，都唔知點解會咁編排。

架駁機係波音777，都算寬敞，本來好想再叉電，但係已經唔眼瞓啦，算啦，睇吓小電影.....談談情錫錫狗(Must Love Dog)....

去到加德滿都，仲係下午時份，好在特區護照免簽證費.....係無睇錯.....免簽證費...唔係免簽證.....所以要排隊攪落地簽證......仲有當地人做野......好.....鬼.....慢......

終於去到機場出口，第一時間搵當地導遊，然後去酒店。坐上架大貨VAN，欣賞市內"風景"......同記憶中lonely planet 電視節目介紹差唔多.....同幾年的我去嘅斯里蘭卡亦都差唔多.......斯里蘭卡仲要乾淨少少.......

去到酒店(其實係賓館，著草梗係住賓館，同無線劇集大圈仔住嘅賓館差唔多，只不過無鳳姐)，酒店房都算企理，好就一定稱唔上，不過可以接受