[游记]尼泊尔游记-第五天

December 09

尼泊爾遊記-第五天

今日係大日子，11月17日，唔知咩事嘅，肯定唔係老友。

講返個旅程先，一朝早4點幾就起身，天都未光就要出發，去邊，著草呀嘛，吓攪錯咗，原來係上山睇日出，鬼咩咁早又要起身，係有d神智不清。梳洗完畢，將所有可以著嘅衫都著上身，因為真係好Q凍，咁當然有用頂冷帽啦，真係要多謝導遊提醒。

出發啦，街上都有好多人，因為大家都有共同目的－－上Poon Hill 睇日出。一行行人行緊啲唔知咩路，因為街上無燈，而且天未光，原本手揸電筒，但係好大風，凍到隻手無反應，咁就摸黑上路算啦！一路行，一路喘氣，因為空氣真係稀薄啲，但又唔可以停太耐，因為日上三竿就無哂意思啦。攪到情況有啲似喪屍出籠，大家無意識咁追住目標。成段路行咗大半個鐘，終於到頂啦，好彩天啱啱開始光。

上到去，仲見到好大個月光，原來當晚係農曆十五。嘩，雪山好正呀，不枉我地行到差唔多死，被雪山環抱嘅感覺好鬼正，仲要唔係普通雪山，係喜瑪拉雅山噃!! 全地球最高嘅地方喎，雖然Poon Hill睇唔到額菲爾士峰(8848米)，其他見到嘅山峰都有8000幾米，算係咁啦!

不過風景真係好正，全部雲係哂腳底，一眼望去包圍住啲山，終於知道好似仙境點解，最好有埋仙女......而且喺日頭出嚟之後，每分鐘嘅山景都喺度變化緊。雲、霧逐漸散去，山上嘅雪由黃變白，影咗超多相。喺呢個時候攞咗部手電出嚟，睇吓可唔可以喺高峰打俾屋企.....有訊號，不過好弱......可惜.......喺山上完全與世隔絕.......究竟係好事定係唔好事呢??

原本成個山頭有超過150人，我地走嘅時候應該得返30個左右，時間唔早啦，要返去食早餐啦！食過早餐，又要開始我地緊湊嘅行程。又越過高山，又越過谷，係咁行，導遊又話係落山，點知要爬過另一個山先有得落山.....玩咩野呀，行咗起碼個幾鐘先過倒咗山，跟住真係落山啦....好野 !

今次體會上山容易落山難，下山嘅路都幾難行，而且好多泥，好冼.....好彩買咗支行山拐杖，如果唔係應該死咗9次......仲有行到膝頭哥超痛，不過就無氣喘啦！去到中途站，差唔多1點鐘，比平時12點遲啲，可能因為一朝早已經有行山，所以體力差啲。

食完午餐，又出發啦。行多個幾鐘，其中一隻鞋開始笑，行到就到賓館嗰陣，個鞋底甩埋添。去到賓館嗰陣，天已經黑咗一半，跟住又係老馮節目，沖涼加晚飯。當晚同樣都係無叉用，唔係，係無電用，要點蠟燭。食完飯，大部分人都留喺common room吹水，期間見到幾個韓國人，仲傾咗陣計，後來佢地班友喺度狂隊威士忌，4個人飲