[游记]尼泊尔游记-第四天

December 07

尼泊爾遊記-第四天

早上起身，行出露台，天氣都好好，而且見到賓館前面嘅通道已經有其他行山者經過，仲有一群群嘅驢仔或騾仔(唔識分，總之唔係馬，但個樣就好蠢)孭住啲物資經過。我地亦儘快梳洗，繼續我地嘅登山之旅。

食過早餐，執過行李，出發。照舊係挑夫們孭住我地嘅大背囊先行一步，我地亦魚貫跟隨。當然好快就被拋離，話哂係佢地地頭。行咗大半個鐘度啦，抬頭一望，終於見到雪山，不過只係其中一個，魚尾峰，仲要係啱啱見到個頂，不過風景都已經好過之前嗰日好多。一路行，見到無數梯田，亦開始見到更多山峰，雖然只係普通山仔，都已經令人心曠神怡。

行到大約中午12至1點左右，又係時候食飯，選擇亦都係嗰d，味道都差唔多，無所謂，有得食好過無野食，而照舊亦都等1粒鐘，不過又唔係趕返工，日頭都幾猛，休息吓算啦。等食飯嘅時候，突然見到牧羊人帶住一大群羊放草，咁我地又無野做，梗係第一時間同羊仔玩啦。呢啲羊仔嘅毛幾軟熟，而且仲有好多顏色。啲羊任得我地，又唔咬人，可能佢地太肚餓，淨係掛住食草，所以任我地搞。過咗一陣，有人吹雞話食得飯，咁我地就同羊生羊太分手，去洗手然後開飯。我地食飯嘅速度亦照舊咁快，三扒兩撥又搞掂，仲食咗碗麵添。

食完飯之後，天氣又變得唔好，多雲大風仲有d凍，好彩嚟呢個旅行之前特登買咗二合一goretex風褸。休息咗一陣，繼續我地嘅行情。因為今日要上到2800米，所以要捉緊時間。今日嘅路其實都唔係好行，好多時間，條路向上嘅角度有成70度，而且空氣真係稀薄啲，行一陣就喘哂氣，心又跳得好快，要經常停低抖順條氣先可以再行。

到咗5點幾，終於到賓館啦，天亦開始黑添。臨到賓館經過1檔賣冷帽，原本無諗住買，但係導遊話夜晚會好Q凍，同埋第二朝去Poon Hill都會好Q凍，咁咪買囉。好啦，天黑啦，快啲沖涼先。當晚賓館係無電供應，所以沖涼嗰陣要搵電筒照住，咁當然唔係自己攞住，亦都唔係搵人幫手攞住，而係掛喺天花板角落頭。沖完涼，梗係食飯啦。不過喺食飯前，竟然有毛派游擊隊成員走嚟收數，雖然係單人匹馬無攞槍，但導遊唔俾會好麻煩，算啦，都唔係好多，150蚊港紙，咁俾囉，旅行都唔想有乜唔開心事發生。

食完飯，諗住去做大事嘅時候，突然友人話賓館外有野睇，我唔係好想去，因為屎神急call，但係佢係咁叫我去，算啦，睇吓你班友搞乜？原來佢地好有我心，叫導遊整咗個生日蛋糕同我預祝生日，原來同團仲有另一男友人都係同日生日，仲要係同年同月同日生添!! 好感激佢地，原本諗住自己一個過生日，