[游记]新加坡游记哉哉版Day2

December 04

新加坡遊記~哉哉版~Day2

第二日27/11/2005

因為好想試下酒店泳池既質素, 所以特意晨早起床(其實都唔係好早,都接近8點), 快快手手落去游個早水, 此時621之友仍在睡夢中, (好後悔無影佢相以作日後勒索之用) 從621旁邊個gym room 出去就已經見到個泳池, 望落去仲以為無人添, 點知行埋去先見到有對父子+ 一個叔叔類物體, 佢地好似想游又唔游, 可能同呀印巴籍泳池管理員不太友善有關, 最後我都無理佢地, 自己跳左落去游左20分鐘, 跟住就返房洗頭沖涼, 跟手諗住電話提埋616 & 618之友們就拍醒621之友啦, 撞鬼一講完個電話就俾佢嚇番轉頭…….reception叔叔…….我要殺左你………..

人齊後就殺落去食早餐啦, 真係…..水煮蛋既水準一如其名, 個奄列同杯西柚汁係ok既, 反而最好食係個多士, 不過最攪笑係攞野食既時間烏燈黑火, 到唔俾攞野食, 工作人員開始清理現場啦就燈火通明…….真係…..費解……費解……….

食完早餐, 我地就開始我地既行程, 去Jurong East 轉66號巴士前往新加坡科學館, 係唔知架車去唔去到, 唔知仲有無車去到, 又唔知幾時落車既情況下, 其實……我覺得都幾好玩, 哈哈, 臨到科學館之時, 經過雪城, 基於一場黎到既心態下都入去望下啦, 點知…..乜都睇唔到, 最後係門口影左張超爆笑既相, 我相信呢個係上天既安排, 錯有錯著用連環快拍影到呢幾張雪地連環圖, 作為一個攝影師, 真係汝有榮焉~~~~~~~

主菜, Star War Exhibition, 買左飛先發現原來要睇star war exhibition 係要買另一隻特別(貴)既入場卷……俾個新加坡旅遊局網頁呃左添……..算啦, 都黎到咯, 無理由唔入去睇下架……入到去, 我覺得最好笑既係擒晚去夜間動物園就話因為閃光燈係會影響動物既眼睛所以唔淮用啦, 都好正常, 但係點解個star war exhibition 都唔淮用閃光燈呢????請問有無d有識之仕可以解答到我呀, 唔該~~

成個展覽我覺得最好玩係測試平衡力, 哉係有1.2分架, 可惜, 正常女性係有3-5分o個下弊呢……..睇完展覽, 率先去左麥當當買下野飲先, 原來新加坡既麥當當係有冰凍美祿飲架, 真係開心~~~ 之後去左等shuttle bus, 真係一個漫……長……既等待……計番條數先知一人慳左3亳子坡紙……仲要個車程先係得個5分鐘, 真係話咁快就到~~~~~

去完科學館, 順手就搭MRT去Bouna Vista轉200巴士去埋荷蘭村啦, 個feel真係幾似天母, 同時亦都係應該夜晚去會更有特色, 不過都好彩, 係參觀完bread talk 既麵包超人之後都俾我買到幾件手信(包括小叮噹, 呀Jack 同埋小海豚), 都算不枉此行. 建議下次去既朋友安排夜晚先來荷蘭村, 加上佢又起緊個荷蘭村老巴剎, 應該會愈夜愈有feel~~~行程緊迫, 搵到架直車返牛車去我地就直接去食阿坤多士啦, 嘩, 咖椰多士+水煮蛋+奶茶, 真係要用5個good去形容, 呢餐我覺得係o係新加坡3日裡面最滿意既一餐, 加上呀伯伯親切既笑容~~~~~~俾多六件呀唔該~~~~~~

食飽飽, 就行下街啦, 前往boat quay 途中, 靜靜表演佢既拿手周星星舞, 真係無得頂, 可惜係呢項絕技不能被攝錄低, 唔能夠各大眾公開, 可惜可惜, 無辨法啦, 只有新加坡之友先有機會觀賞到啦, 呵呵~~~去到Singapore River, 剛巧進行龍舟比賽, 原來我咁大個女都未試過現場睇龍舟架, 嘩, 都幾好睇呀, 隻隻都好似一齊過終點咁, 我地散步到去後台, 此起彼落咁有好多參賽者圍住歡呼, 都真係幾有趣. 沿路行落去終於去到新加坡地標魚尾獅啦, 大家為左証明自己真係有去過新加坡, 都紛紛同呀獅子合照, 仲順便影埋對面旅行社必到既榴槤頭濱海藝術中心添, 真方便~~~順帶一提, 要魚尾獅做手信既朋友, 因為d product實在太唔得, 或者大家唔介意我地晒張相俾大家算啦, 哈哈哈~~~~

礙於都仲係好飽, 因此我地亦順勢步行往老巴剎, 沿路經過Collyer Quay, 我相信佢以前都係一個好受人歡迎既遊玩點, 不過家陣既有Clarke Quay, 又有Boat Quay, 珠玉在前, 難免令人覺得Collyer Quay 比較失色. 行下行下, 唔經唔覺已經行到去老巴剎, 天色仲早, 個肚仲好飽, 咁點算啦, 大家就決定先坐一陣, 最衰無帶UNO出黎, 如果唔係先進行熱身賽都好呀~~~老巴剎入面真係好熱鬧, 熱鬧到有d太嘈既感覺, 大家行左個圈之後耳仔都唔係好頂得順, 因此決定選擇係出面d串燒檔度坐低食野, 叫左串燒牛啦, 雞啦, 蝦啦, 炒菜啦, 炒蜆啦, 同埋魷魚既, d串燒都幾好食, 個炒蜆就一如香港既小店炒蜆咁, 殼係多過肉既, 其他都ok啦. 食完飯, 大家都行到有d累啦, 就打的返酒店啦, 因為真係好近既關係, 今次只係需要2.6坡紙就返到酒店啦, 抵呀~~~返去準備開戰之前, 我地係酒店附近都行左幾個圈, 目的在於要搵出梗有一間係左近既7仔, 買定d糧草, 準備開戰時用, 行左一陣, 先搵個間細細間既7仔, 入完貨之後就隨即返酒店準備啦.

大家稍事休息後就決定係621集合, 進行今次新加坡之旅既重頭節目: 新加坡大富翁爭霸戰, 呢副由蕉主任從香港千辛萬苦帶來“有錢佬遊戲” 真係一副不得了既遊戲, 首先係開始前我地研讀過那份賽制, 真係好一份由衷從肺腑發出既規條……首先…..我地要先打開個盒……能夠睇晒成份野, 作為一個玩家, 唔訓著都算係好俾面, 不過佢有個優點, 就係引入左商業間諜呢個玩法, 真係相當刺激, 加上仲可以方便各位肚餓既團友中場去食個杯麵, 真係一舉兩得~~~~~~其實大家玩極都差唔多咁有錢, 唯有以第一名最快破產藉以完結呢局, 最後恭喜躉黃再一次蟬聯監躉皇呢個寶座, 與及恭喜怒怒能夠擁有情陷夜中環呢塊地, 可以一親四哥芳澤, (註: 返來後幾日係公司見到張memo標題係: “情陷夜中環” 演員啟動救世軍聖誕暖鍋行動, o個一刻我係office忍唔住笑到標眼水) 跟手就玩埋第二個皇牌遊戲: UNO, 為避免上次中山事件再發生, 今次訂下700分為目標, 最後本人係成功突圍以一局輸百幾分黎勝出呢次賽事, 真係開心到. 中場大家去洗手間之際, 621之友都以踩爛對方張床為己任, 怒怒亦加入戰陣, 好開心, 最開心既係蕉蕉忍唔住問大家都有成75歲, 仲跳乜鬼野彈床, 我地答, 其實已經過左75歲啦, 哈哈哈哈~~~~呢次老野跳彈床真係一個勁愉快既遊戲, 對於furama 張床竟然仲係絲毫無損, 亦係值得一讚. 之後蕉, 怒, 森美與躉黃進行迷你麻雀皇大賽, 哉與靜則進行超迷你飛行棋決賽, 但係最後都係敵唔過周公子既邀請……臨走前先發現616既團友唔見左張card key, 大家立即翻轉間621黎搵啦, 呢下真係醒晒, 但係都無發現, 最後616團友唯有落去reception去辦下手續啦.

經過一日辛勞, 原本我都真係好眼睏, 諗住熄晒d燈早早入睡啦, 點知……訓訓下……聽到621之友床邊有d聲……其實我以為因為d房既牆比較薄, 所以係牆裡面既水管發出既聲音……點知次數愈來愈頻密……無理由成4-5點都仲有咁多人用水管架…..靜心留意一下….發現每次621之友一反身向左或向右, 之後都會出現呢種有如mouse中間個轆咁既聲音…….諗下諗下, 終於忍唔住, 攞左個手提出來望下依家幾點, 發現都仲係5點幾, 搏一舖, 先開左個床頭燈, 再開埋個厠所燈, 好啦, 跟手開晒所有燈…….好啦, 安全啦, 就走去窗邊(其實我都唔知點解當時仲夠膽行埋去) 打開埋個窗簾,