[游记]香港历史博物馆游记[专题]

自從政府話要折碼頭開始,啲人就成日將一句說話掛係口邊,咩都講集體回憶,上至名勝古蹟下至四叔公檔雞旦仔,好似講咗實無執輸咁款,可能形啲、潮啲掛!不過,集體回憶依家嘢,你話係呀係咩?有無問過全香港人呀?你檔雞旦仔我唔識喎!如果要我界定集體回憶,我會答你最少要得到絕大部份嘅香港人認同,一定要對我地有特別嘅意義,而依種意義同價值仲係唔會受時間所改變,無依幾樣嘅話點可以叫集體?點能夠叫回憶?因此,我認同鐘樓係我地嘅集體回憶,果啲無聊人所講嘅無聊事物,我只當佢係廢話。

我認為之所以稱得上係回憶,重點係在於過去,因為無過去自然唔會有回憶,如果真係咁想知咩係正宗香港回憶嘅話,我有一個好正、好啱FEEL嘅地方介紹俾大家!就係位於尖沙嘴科學館徬邊嘅香港歷史博物館。

係依個館裏面所放嘅圖片、相片、陳列品、模型、裝飾、裝修、報置,全部都同香港嘅發展歷程有關,活生生咁將香港由史前到家下嘅成長重現各位眼前,內裏包括咗好多香港發生過嘅大小新聞、逸事、掌故等等,總之就係唔講你唔知嘅嘢!仲有全部都經過考究,每件事物有詳盡講解同豐富嘅介紹,如果各位唔鐘意睇字,又可以係入口嘅辦事處租部收音機,行到邊佢就會講到邊,租用費都只係十蚊雞,但我發現大部份租用者都係一啲帶住小朋友嚟嘅家長,因為可以係仔女面前威威!..[爸爸,你識好多嘢呀!]

唔係我懶、唔係我唔想寫,而係咁大個場地又咁多嘢睇,橫掂都寫唔晒不如你自己去睇喇,有冷氣又有洗手間,仲要逢星期三免費入場(所有康文處嘅博物館逢星期三免費),有咩好得過同屋企人或者男女朋友去先?隔嚟就係科學館,重點在於消磨全日都只係花費幾支汽水,唱K LUNCH都唔得喇!

最後唔可以唔提,大家有一個SECTION一定要去,就係臨到館場出口嘅部份,有一個裝修到好似大會堂嘅短片放影室,內裏播放香港人點樣係過往日子,兢服種種艱辛同動蕩,例如中英局面、九七問題,股災等等,背景音樂係羅記嘅獅子山下,真係好有感染力!我同WILL.C.每次都必定會入去振奮下自己,睇清楚香港人嘅拼搏精神,任何日子都可以挨得過嘅不掘不撓,就會發現我地依家所面對嘅困難係何等渺小,咬緊牙關、小啲埋怨多啲付出,香港就係靠依樣嘢先有種種嘅輝煌成就。

地址:香港九龍尖沙咀漆咸道南100號(香港科學館側)

電話:27249042

傳真:27249090

電子郵箱:hkmh@lcsd.gov.hk

網址:http://hk.history.museum