[游记]好赶好赶曼谷游(二)

今日展開我地第二天既行程，朝早大約0900起身，行出個露台，雖然無靚景睇，但黃Sir話都要企喺個露台影返張相喎~!

之後我地就落左樓下酒店餐廳食早餐，早餐以自餐形式，大約有十幾款食物，都係一般既腸仔、火腿、蛋、沙律、麵包等等啦!當然早餐唔好寄望好豐富，而且早餐食極有限，所以對我來講尚可接受! 有時上Forum睇都唔明點解D人成日嫌早餐呢樣果樣，又話得十幾款太少，你食得哂咁多嘢先講啦~

我食飽後就享用下酒店設施，用下免費電腦上下網先，仲同朋友仔MSN咗一陣添呀。喺餐廳度遇見一對日本人，我咁啱喺口又撞到佢地，同佢地講咗聲：【おはいようこざいます(早晨)】，佢地即刻好開心咁回咗我一句後，就問我邊度黎，玩幾耐...又話鐘意去香港，果然好熱情丫呀!

(用電腦的地方)

老公都食飽後，我地就沿路行去BTS站，沿途好多車好大塵，我諗酒店唯一唔好處就係呢條路，但係當自己喺曼谷行咗幾日後，我就發現，根本唔關酒店地點事，而係整個曼谷既路都係咁污糟大塵同凹凹凸凸。就算去到邊度都係一樣。

(好大塵的街道)

(酒店對面的Cafe)

(浴路經過呢間叫Asian Herbal的SPA/Massage，本來都想試下，但一來要提早Booking，二來Forum的朋友話試過，雷聲大雨點小，除咗門面靚D，唔覺有咩特別，又貴D...所以都係無試嘞)

(酒店前少少仲有間賣Bra的舖頭，裝修得好靚，都唔平架...)

(行咗大約六分鐘就到車站啦，酒店係位於呢個站既~)

(喺車站上面影出去都見到酒店架，係咪好近呢~)

我地今日目的係去Shopping，我地去咗Siam站的幾個商場，去咗Siam Discovery、Siam Centre同Siam Paragon。

呢兩個商場去Information拎申請遊客就可以有九折咭啦! 但原來如果喺泰國既商場買嘢其實都唔平，好多嘢價錢分分鐘俾香港貴呀! 以我最愛既Adidas為例，明明喺香港見到既袋賣大約HKD400，喺果度賣竟然計返要HKD550! 似乎都係本土泰國嘢低啦! 不過最終我地都有買到少少嘢!(我係咁買香薰油呀..哈哈) R返佢個九折用下先!

之後我地就去咗食嘢嘞。午餐我地可以好求其，喺Foodcourt食咗少少嘢就夠啦!!但都好好味呀! (雞飯同牛肉河....個湯底超甜呀~)

食飽後就慢慢行去MBK果邊，一入到去感覺係: "羅湖商業城"呀!!

(MBK外貌)

(去MBK梗係要試下出名的多士MONTS啦，可惜忘記影相~另外仲有豬手飯，都好正呀!)

食飽後再行咗一陣已經好攰好攰啦，而Book做Foot Massage既時間又就到，於是就搭車返酒店放低D嘢，就落去做massage啦!

呢間Massage之前睇forum有人介紹過話都唔錯。而且好近酒店(喺隔離咋)，另外佢個小白屋feel我都好鐘意呀，感覺好清新好舒服，於是就即管試下!

(真係好近，一出酒店行十步唔駛就到)

(小白屋，我鐘意...)

(價錢牌大大個放出來)

由於裡面環境不便拍攝，我唯有形容下啦!我地第一次試做先做Foot Massage試下先，淨係坐果張做massage的梳化已經加哂分，成張梳化可以整到好平，張梳化舒服到我做做下massage我瞓著咗呀! 技師手勢都唔錯，力度適中，佢地好靜唔傾計架(喺大陸做果D 佢地成鬼日傾計架)，另外又播埋果D好輕既音樂，又有點香薰，燈光又暗暗地，我地可以完全好relax咁做massage。環境清靜、服務同手勢都好好，真係同大陸差幾皮呀!

另外仲有一樣一定要讚，佢地唔呃鐘架!(因為大陸做通常話做2個鐘，佢地做咗1小時45分鐘就開始收手)。我地book做1個鐘，佢淨做腳都做足1個鐘啦! 然後再用咗大約20分鐘時間幫我地鬆下個膊頭、頸、手同頭，總共係1小時20分鐘，我只係Book做Foot Massage真係估唔到連手頭膊頭都幫我地做咗陣呀!!

呢兩日行到勁攰，唔係去按一按真係人都癲。我同黃Sir就完呢一個鐘後好似有咗共識咁，即刻Book咗聽日每人2小時，原來做2個鐘有15 Off架! 又真係幾抵喎!仲有樣嘢勁好笑，我又喺做massage時撞到果對日本人，原來住果間酒店既人，都貪近鐘意去呢度做massage架!!哈哈!

離開Massage House後先返上酒店拎返少少嘢，又準備出去嘞! 出去前我地先走去酒店泳池同Fitness Room睇下，又真係幾得喎。可惜我地唔識游水~

(泳池細好，但幾乾淨)

(留咗15分鐘唔夠就開始天黑啦~)

(入黑後開燈好似仲有情調喎~)

(基本健身設備都有, 仲有張按摩椅同有其他機，不過無影到~)

行出酒店，又影下酒店既夜晚Look俾你地睇下先~

(睇睇下, 我都好鐘意間酒店添)

(大大個招牌呀...我諗佢真係好新)

離開酒店我地搭車去Silom站的夜市，唉~唔去好過去! 好似廟街咁囉~你想搵既嘢喺Night Bazzar都會搵到!但果度就係街邊檔，都幾污糟呀!

行咗一陣，離開果個夜市後就去搵食，由於好多食店都係10:00就收舖，而我地離開時都已經差不多九點啦! 有D食店又唔啱我地心水，行咗好耐總於搵到地方食日本菜，又飲返兩杯，然後就返酒店嘞。

其實我諗曼谷真係好多日本人住，周街都係日式餐廳，有條街更全部都係掛哂日文招牌添呀!! 最搞笑今日我問路，有個泰國佬用日文問我: 【你係咪日本人呀?】我用日文答返佢:【唔係呀，我係香港黎架!】呀泰佬勁笑話：【好奇怪呀，大家唔係日本人但用日文講嘢...】哈哈哈!!當然，最終我地都轉返講英文~!

順帶一提，老公今日竟然喺泰國剪頭髮，佢話泰國人剷既陸軍裝型好多喎!又的確手勢係好過香港既!

新增回應