[游记]警察博物馆之行.顺便游游姻缘石

端午節個日搭巴士上山頂，途中俾阿潘生發現警察博物館，佢梗係唔會放過啦(事關佢恨做警察恨到流口水，想當年佢都係去到最後面試先唔掂咋，唔係佢都做左架喇)，終於今日我地就用番上次既慳錢路線甘行，搭巴士去到灣仔峽道落車，行五分鐘就到喇，講真個到有好多警察舊相、舊用具、舊制服，真係都幾多野睇，原本我偷偷地影左d相，點知原來未經館長同意拍照係犯法架...我真係唔夠膽博，所以冇得俾大家睇lu...真係可惜，唉...個度仲有個真既老虎標本架....所以都係個句，想睇自己去啦...不過公眾假期休息架，要去就星期六日去啦。

之後因為我想去姻緣石到見識下，所以我地出番出落車點，再沿灣仔峽道行，嘩救命呀...唔係上山係落山架條路，你地可能好奇怪落山都要叫救命，全因條路好鬼斜，仲行左成廿幾分鐘，我一落到平路，膝頭哥同腳趾公就想死，梗係啦...我負磅甘勁，落山行廿幾分鐘不停要佢地受壓，唔痛至奇啦...

捱過一段山路就行一道勁多人跑步既寶台道，沿途都可以俯瞰灣仔既景色，可惜唔知有咩怪味隨風吹過黎，臭又唔係臭，總之就係怪，行左十分鐘就到左姻緣石，沿級而上，到處都擺滿奇怪神像，真係明符其實滿天神佛，影左相跟住走啦，點知有奇事出現，我同潘生一齊大叫，佢叫因為佢俾蚊針到痛，我叫因為我見到佢短褲下既左小腿，同時有五隻大蚊開緊餐，我諗到冇諗用抹汗巾大大力一野打落去，哈哈哈.....當然冇一幸免啦(包括佢隻腳...即時紅左一大撻)...呵呵...我咩到唔知啊!!!!呵呵!!!!

最後因為寶台道既地點係冇車到既，所以一係就沿頭先條斜路上番去搭巴士(行落黎都想死，唔好話撐上去啦)....就係冇得選擇之下，我地唯有繼續沿下半段既灣仔峽道落，就係甘我地又要「lok」廿分鐘超級斜路，返到落山，唉.....

好彩潘生話要幫我補補腳骨力，帶左我去食肥彭至愛—蛋撻.....唔....個撻底好脆一流啊...之後再去食多次王府餃子..