[游记]国庆长周末的多伦多游记(之一)

剛剛過去嘅長週末，我哋去咗多倫多遊逛三日，我係家庭主婦 (即係做<亞四>)，去旅行之前要執嘢，返來之後要 unpack 所有嘢，都係我做，足足就有五日冇時間寫過嘢。我成日都係咁忙，不過，我終於可以騰出一 d 時間開始寫幾隻字，又講下今次嘅三日遊。雖然食咗两餐 [美食] 同埋買咗好多樣 [心頭好]，都幾開心。不過，却遇到两樣激氣事，攪到唔開心。

六月三十日，星期六，天氣晴朗。一早去租車公司攞架中車，因為長週末，特別價錢，新車好舒服，好過揸自己架舊車。雖然公路有好多車，長週末係咁嘅啦，四個鐘頭車程，總算順利喺下午一時去到多倫多，先去那間唐人大超級市場嘅 food court 食 lunch，我想食果 d 新鮮炸起嘅油炸鬼、牛利蘇好耐囉，重有亞仔要食嘅炒麵，我老公要食粥，佢話好味喎。亞仔唔識中文，但係佢見到寫住牛利蘇果個名牌寫住 Chinese sweet donut，笑到佢碌地。(唔好笑我哋老土，等你冇乜機會食呢的嘢果陣，你就知)。

食咗 lunch，已經係下午两點，不如先去 check-in，放低 d 行李，先再出去週圍逛到夜。今次我哋試下 [新地方]，去住學生宿舍。其實，我哋舊年感恩節長週末住過百年學院嘅學生宿舍，覺得麻麻，今次去住史力加學院嘅宿舍，因為呢間學院靚好多，出名好多，大好多。點知check-in 果陣，問果個人要 password 開 internet，佢居然話週末 shut down internet！我哋明明喺網上訂房果陣，已經問明話有免費上網，我哋先訂房，點解會係咁架？佢重話，連 dial-up 都唔 work 喎，真係豈有此理！我就話，神又係佢，鬼又係佢，講個 password 俾我哋知就得啦，成座宿舍大樓，點會冇internet？結果，我哋入到房，係好大，入面又分有两間睡房、一間廁所兼冲花灑，[厨房]有枱有椅有微波爐，重有個家庭 size 嘅雪柜，每個睡房有張雙人床、長枱、椅、電視、電話等，於是，我哋駁咗一個laptop 去個電話 jet 度 (我哋帶咗三個 laptop，但冇用)，可以用 dial-up 開到internet，唯有我同老公輪流上網，亞仔唔用，佢玩 Gameboy 同睇電視。

(有好多嘢要講，但我而家想睇两集<溏心風暴>，然後瞓覺，明天繼續寫，現在係星期二晚上＋點幾)

新增回應