[游记].

果然，回程真係冇乜塞車，望下對面果幾行去尼加拉瓜嘅行車線，見到果 d 車仍然好似蝸牛咁停下行下，睇怕天黑都唔知去到未，好彩我哋 [够醒]，改路行，穿過埠仔而去，不過都係失咗預算，两個鐘頭嘅車程行出六個鐘頭。

傍晚七點半，因大塞車，失咗時間上嘅預算，我哋冇食lunch，只係朝早喺學院宿舍食堂食咗果幾塊麵包，一早消化晒啦，餓到扁，於是就直去 [天星國際美食] 食buffet (又係自助餐！)，今次成日冇食嘢，重唔食番够本，幾時都係，老公比我同亞仔食多一倍或更多，譬如呢次，我飲一碗魚肚，老公飲两碗，我飲一碗鴨絲湯，老公飲咗三碗，果 d 豉汁蒸生蠔，好似手板咁大隻，唔係成盤擺喺度任人攞，而係有個亞姆分配，一個人一隻，而且一陣間就分晒，我食一隻已經够，亞仔唔食呢隻嘢又唔肯去攞隻返來，結果，老公攞咗一隻返來擺低，即刻走出去又拎到一隻返來，果個亞姆唔認人，只係有人遞個碟埋去，佢就夾一隻大蠔俾人。老公食咗三隻大蒸蠔。呢間美食軒有中、日、泰美食，我哋又食到捧住個肚行出嚟。剛好隔離有個新起 (重起緊) 嘅 [錦鏽中華] 商場呢幾個週末舉行露天市場做推廣宣傳，我哋咪行過去睇下，由於當時已經入夜，又凍又大風，而且果個露天市場只有十零檔賣小食或者賣小飾物，無乜嘢好睇，於是就入去果個商場 [巡下]，嘩！好嘢！果度啱啱有個 [香港五十年] 嘅圖片展覽，有成百幾張黑白同彩色嘅相，好靚，又有中英文說明。於是，我哋同人哋一齊，逐張逐張睇，我哋更加要亞仔睇，等佢知道下香港地方係點樣，等佢認識下佢亞爸亞媽細個果陣所住嘅地方 (真係有徒置區廉租屋區嘅相為證)。睇相睇咗成個鐘頭，我哋下一步係要去買 [伙食]。(明天繼續，會寫完呢篇遊記)

新增回應