[游记]台北之行-2

台北之行 - 2

好快又第二朝 23/6, 仲要差唔多11點添. 起身PLAN下去邊先, 本來預定去附近既『度小月』, 但感覺好唔順路. 所以決定去遠少少【西門町】. 去到都12點幾, 先去試下『鴨肉扁』. 由於小弟國語唔係好得, 個人問我食咩. “麵．米粉”, 我聽左“麵．米．粉”. 我叫 “粉”, 點知黎米粉. 我望下牆上面D字, 人地又真係寫“麵．米粉”喎~ 跟住哥哥仔又問我要唔要 “切”, 我又聽唔明, 佢問我要“兩百” 定“三百”. 我要左兩百塊. 叫完見到前面條女陰夕咀笑, 一睇就知係香港人. 成間店有一半以上都應該係香港人, 睇得出個格囉. D鴨又嚟到, 都幾滑幾好味, 有2隻醬點. 一隻甜酸, 一隻醬油. 兩隻都好好味. 好快食完D嘢, 因為太餓喇. 預計嚮度區會食埋『阿宗麵線』, 但太飽未食得落. 行下先, 原來都幾大架. 又幾集中咁, 行左一陣, 搵左間二樓茶店飲茶. 茶分兩個size, 500cc同1000cc. 點左杯500cc既 “多多綠茶”, 再叫左件“沙哈”蛋糕. 慢慢嘆~ 坐左差唔多兩個鐘, 打算去『老天祿』買鴨舌. 一落樓個天黑晒, 即刻去『老天祿』買鴨舌. 買完出嚟大雨到呢, 我估應該有黑雨. 好彩佢條街係可以打圈咁行, 但都等左15-20分鐘左右先冇咁大雨, 冇咁大雨個陣行返去『阿宗麵線』食麵. 以為又係成碗麵, 原來係好似碗仔翅咁. 得大碗同小碗, 當然點左碗小嘅食啦. 個個都企嚮度食, 食既中途仲有班日本遊客嚟排隊添. 濕左半個身, 打道返酒店沖個涼換件衫再準備今晚既行程.

搭捷運真係好鬼方便, 又舒服. (捷運係咩? 即係地鐵囉~) 幾個站又返到酒店附近既站“忠孝敦化”. 行左一陣東區地下商店街, 發覺台北都幾多地方俾D人hea 架喎. 買D嘢飲返酒店, 諗住嘆下鴨舌, 爽!!! 沖完個涼, 第一時間試下D鴨舌先, 原本香港平時食到既得前面少少, 第一次食埋後面個兩條骨, 成份鴨舌就好似一個丫叉咁. 幾好味, 幾辣~ 食飽瞓一陣, 7點幾又起身準備去【士林】.打算食下【士林夜市】出名既野, 跟住本書行行行, 都唔係好多野食咋喎. (其實係覺得唔夠吸引放唔落口) 行左2個幾鐘, 食左3樣野. “胡椒餅”, “雞蛋蚵仔煎”, “大餅包小餅”, 仲飲左杯檸檬柑桔水添~ 最好食既係“胡椒餅”, 最唔好食既係“大餅包小餅”. 又搭返捷運返酒店, 沖涼睇電視. 太多電視睇喇~ 呵呵~ 買左電視賣廣告既咖啡飲, 真係幾好飲. 唔太甜, 唔嗆喉, 又幾滑. 但呢晚就慘咯, 飲左咖啡瞓唔著呀~

好辛苦咁到左第二日 24/6, 今日係最後一日喇. 但瞓得唔係咁好, 行程都唔咁辛苦喇. 先去附近【忠孝敦化】既『度小月』食個brunch, 原來佢以前都好似D舊式麵檔咁. 係重新裝修左, 靚左好多. 好多人丫, 有三層, 第一層得一張檯四張板凳. 太熱唔建議坐呢度, 有人點左野食走鬼左添呀. 叫左“擔仔棵仔條”, “滷蛋”, “炸豆腐”, 都好好味喎. 同時留意到, 成間野又係好多香港人…又係旅遊書介紹既境點.

食完野, 衝去【西門町】買鴨舌返香港, 買完見仲有好多時間, 又上左另一間茶室飲嘢. 今次仲試下薯條添, “加拿大薯條” 唔知係唔係慢工出細貨呢? 佢地整嘢真係好慢, 但水準唔錯架喎. 所以去旅行都應該俾多D耐性, 我地係去享受人生嘛~ 爽呀~

行程最後一站『台北101大樓』, 由【西門町】搭的士去都係NT$210. 但去左好鬼遠, 唔緊要個司機都幾好人咁. 又問下我有冇去『士林夜市』咁. 好快落左車, 入到『台北101大樓』, 嘩..嘩..嘩... 好大既SHOPPING MALL. 全部都係名店嚟既~ 有D 似返左香港既IFC, 但佢又真係好高, 上一層好似人地上左兩.三層咁. 行左一個圈就夠喇, 因為真係買唔起D嘢. 經天橋行去GRAND HYATT搭巴士出機場, 順道借用一下酒店個廁所. 入到酒店, 又係大到嘔既龐然巨物. 入到廁所, 有唔想出嚟既感覺, 心諗本來我都係住呢度架…

搭返大有巴士出機場, 由於唔係半夜, 所以都有少少塞車, 一小時就到機場喇. 其實都早左好多去到機場, 當然機場D店舖你用30分鐘都已經睇晒. hea 下又到上機時間, 航班編號CX-451有個好靚仔既空中少爺笑得好甜, D女應該冧死晒, 飛機起飛正式告別台灣. 今次旅行發覺自己真係可以四圍去, 跟團真係唔多啱我. 做咩要跟人去, 又辛苦又要俾人監你食埋D唔知有咩特色既野食呢?如果可以嚮台北生活都係唔錯既選擇.