|
June 20 長洲兩天兩夜麻雀團 第一天 (26 May 2006 星期五):
行程：
下午六時半，與ac1於中大一同飛火車轉地鐵直剷中環，再去碼頭搭快船用大半粒鐘衝去長洲，到步之後o係碼頭轉左直行轉右再直行再轉返左就到左一個出名死得人多ge「渡假村」，滙合左rt, ac2, ec。唔錯ga個look，真係幾有渡假村feel，又近個海灘，幾好幾好～ 沿途景點：
各位搭夜晚8:00船ge團友，可以o係船上望到迪士尼唔太精采ge煙花；若果各位團友想看看海想吹吹風，最好就搭慢船喇，走去後艙有露天無玻璃無阻擋視野景觀，好唔錯ga，可以沿途望下海睇下浪欣賞下日落添～ 遊玩經過：
舖報紙、透爐、燒野食、查蜜糖、食野、執野、洗衫、租麻雀、打牌、開dvd、小睡三小時 感想：
燒烤不要落雨不要穿白衣、蜜糖不要查太多、打牌不要看電視、有日出睇ge時候大家請唔好淨係顧住打牌唔睇日出，因為我會唔好意思自己出去睇 第二天 (27 May 2006 星期六):
行程：
中午起床，去牡丹樓(M記)吃快餐，lp滙合，到單車鋪租單車，嫌貴所以周圍兜，不過兜左去d街市位，所以單車係好多，不過全部都名花有主，於是乎返返去原鋪鐵價不二，點半至五點每位二十元正。踩單車向左踩到山窮水盡，向右踩到天涯地角。踩完之後返宿換衫食飯，抵食夾大件。夜探墳場不果，我們看海去！(獲得 紀念品珊瑚一塊。)兩粒鐘後繼續麻雀大決戰。 沿途景點:
長洲d街市好有營地街紅街市feel，有d古廟都值得兜返一轉。單車舖租車後經消防處(北面)沿着單車徑，上斜落斜後，若遇潮退，有頗有趣石灘，且拾蛤人數頗眾，更有無敵海景，峰巒疊翠，值得一遊。車徑盡處，更有超級長命斜直抵主峰山頂，有能者歡迎攀登。
南面風境較遜，然盡於碼頭處，有梯級連於聞名的張保仔洞，有興趣可沿梯而上試圖尋寶。
食飯唔使睇門面，大牌檔級數露天茶座倒往往出人意表，抵食夾大件兼好好味～
返宿睇完法理何在出門，雖然行程一早計劃好夜探墳場，連電筒都買定兩支，但係無耐少數服從多數，去到門口連到此一遊都未講就雞咁腳逃離現場，其實呢附近雞犬之聲相聞，又有行人走過，都冇咩好驚je
之後去左海邊玩沙睇浪傾下計，長洲東堤海灘應該係第一個有親密接觸ge海灘(竟然比黑沙海灘早)，要記著大海ge感覺、浪ge感覺、捏着沙的感覺和談心的感覺。 遊玩經過：
踩單車、仆親、食飯、白行一趟、望海、掂海、又打牌 感想：
踩單車ge時候，若果前面有架石油單車而你又上緊條斜路，為免重蹈覆轍，麻煩記得轉波～
戈間食飯戈間野真係唔錯！
要探險記住搵多幾個人！
海在呼喚我！ 第三天 (28 May 2006 星期日):
行程：
遲了起床，所以到東堤落水得半分鐘又要上返岸，真係頭都未濕透
本身諗住食埋早餐先走，但係因為落大雨ge關係，全部提早入閘，於慢船船尾望山望海望風景 沿途景點：
仍然是東堤與長洲，不過換了雨景 遊玩經過：
由於於電話較鬧鐘失敗，導致晏起，未落東堤先落雨，未落水先有雷電警報，落水不足半分鐘被救生員以大聲公急喚「先生請迅速上水」請回岸上。
後於到碼頭之一個字路程變做落湯雞。
最後於慢船艙後遠眺無人小島引起暇想～ 感想： 用電話較鬧鐘都可以較唔到，勁到冇野講；
其實天公做美最尾一日先黎落雨已經好俾面，不過請唔好o係倒水ge時候出門，否則你要醃到返宿舍。 總感想：
好玩
|
