[游记]2007长洲太平清醮

2007/5/31

2007

2007-05-24

0雪0雪0雪!!!

上次睇完跳火坑之後, 有人話: "不如下次我0地去長洲睇太平清醮啦~"

"好呀~~"

於是, 今日一早, 我地就向長洲出發!!

呢幾日天氣陰晴不定, 尋日返工仲落0左一場大雨, 返到公司對鞋都已經入晒水. 點知, 今早一睇個天! 嘩!! 竟然係晴朗呀!!! Perfect~

雖然今年入長洲0既人數較以往少, 但入到去, 還是會人山人海. 沿海皮走往北帝廟, 一路上都係小店小攤子, 當中又以售賣應節物品如平安包及有關手信等為主. 賣包子的店固然人山人海, 包子一出籠, 就立即被食客, 八卦的路人, 攝友等, 團團圍住; 另一方, 製作精緻造型得意的平安包小飾物, 咕0臣, 扇子等產品亦大受歡迎. 雖然長洲太平清醮呢一件事, 已經被商業化, 但見到一排小攤子中, 有幾個係售賣自家設計的t-shirt, 閃燈等等, 感覺又有d似一個以"平安包"為主題0既product design exhibition, 非常有趣.

午餐, 已經大汗淋漓的我們專登走去麥當當, 買了長洲太平清醮special: 香脆素菇包, 再加最大杯的雪梨茶, 然後佔了一個觀看會景巡遊的有利位置, 就地站著吃了起來. 老實說, 晌咁炎熱0既天氣, 流了一身汗, 仲有少許脫水0既情況下, 呢個由生菜+炸雜菜薯餅+沙津醬0既包...其實並不好吃. 不過應一下長洲太平清醮的傳統(齋戒),又可以算係食到長洲的特產, 這個包包也算一試無妨.

會景巡遊是近年長洲太平清醮第二矚目的活動(第一係搶包山),當中又以飄色為每年新聞採訪的重點,大把大把人一大早帶定支大炮入去, 亦都係為0左呢一刻.飄色其實是由一0的小朋友, 以古代神話人物, 或是現代新聞人物的扮相造型, 站有高竿上巡遊. 此外, 巡遊隊伍仲包括一系列拿著旗幟, 舞獅舞麟的男女老幼. 會景巡遊於下午兩點先正式開始, 不過晌十二時半, 有幾條在巡遊路線上的主要大街已擠滿擔定櫈仔霸頭位的人, 於是我0地都搵定個位, 邊食邊等. 巡遊一開始, 街上0既人都活躍起來, 個個都拎支大炮去影一大餐, 有d仲誇張到跑去路中/花槽/天台邊緣去影相(可能有d係記者?) 就咁睇個巡遊都已經好興奮, 帶埋相機去玩就更加perfect~ (因為等到無聊時有一部相機晌手都好好玩, 例如... 偷影警察哥哥?!) 嘿嘿, 我都影0左唔少呢~ 巡遊隊伍0的小朋友真係超可愛, 飄色的小朋友一個食緊雪條, 一個手執小電風扇, 一個拎tissue出0黎抹汗, 一個正張咀打呵欠, 一個扁晒咀仔, 一個發緊呆... 真係好想影低晒佢0地0的樣. 除0左飄色, 仲有好多拎旗幟0既, 挑花籃0既, 大頭佛0既, 醒緊獅0既小朋友, 真係kawaii到呢~