[游记]我的台南台中游记之第二天

引用檢舉我的台南&台中遊記之第二天

網誌分類：玩樂遊 |

圖片

網誌日期：2008-04-04 23:22

今日o既活動係懇丁一日遊~~~由於要用盡我地一日時間去晒想去o既地方，所以要七點幾起身，食完早餐九點出發。

話時話，民宿個早餐都唔錯，有粥、菜甫炒蛋、炒菜、仲有我最愛o既花生同肉鬆可以放落粥度。雖然款式普通，但係冇味精&有住家feel嘛。

今日我地全日包車，搵左尋日車我地出懇丁大街個司機。佢個角色好重要，要跟據我地想去o既地方編排行程同路線，又要做埋導遊。

第一站去大光玩浮潛。估唔到原來台南o既珊瑚係出名，我之前有係香港浮過，來到當然要見識下啦！

絕密照片，我facebook都冇架~~~係我同思詠個浮潛look

搞掂晒個造型就跟教練去石灘，開頭比我地用麵包餵下魚仔，真係超多魚呀，好在佢地唔會咬我咋~~~之後就開始浮啦，珊瑚果然係勁多同勁靚！我仲見到唔同顏色o既魚，有d色特別到好似係畫上去咁！不過我就略嫌時間短左d！浮潛真係好開心

跟住去左坐個半潛艇，就係我地身後黃色個架。

係入面你可以隔住玻璃塊睇到珊瑚同魚，我部相機影得衰咋，真係見到架~~~

玩左成朝，下一站當然係開餐啦！司機帶我地去一間近海邊o既地方食野。你睇下幾好天！

好似私房菜咁，講左個銀碼就會幫我地煮。四個人六餸一湯，有蝦有魚有蜆，仲要樣樣都好好味同好有特色。有碟海草好好食架，香港應該食唔返！

冇啦啦個度d人拎左呢舊物體出來，仲係生勾勾係度伸出伸入。小安膽粗粗拎上手影相。

第三站去懇丁游水聖地，南灣~~~藍天呀，勁清o既海呀，落灘呀！超興奮！

雖然多人，但你又唔會游游下成日撞到人，d水又唔污糟！超鍾意呢度~~~

以下為適合與不適合wear太陽眼鏡的最佳例子。幾時都話尖面o既人係勁著數架啦！你睇下我成個盲人咁款！

游完水諗住去沖身之際，發現沖身室要入錢先有水。我地全部加埋得三個十蚊銀，唯有兩個兩個咁沖。到我同美思個組時得返一個銀，諗住快手快腳搞掂啦，點知係我成面洗面膏個陣先來夠鐘！於是都係要思詠出去唱錢。

我覺得比錢唔係最大問題，但唔好係凍水lor！簡直係勇氣o既表現加生死時速o既示範！

第四站原定去懇丁必到景點鵝鑾鼻公園睇燈塔，點知又係個死人春吶，搞到封左成個公園冇得入呀！睇來真係要再來過啦~~~於是司機帶左我地去一個唔係旅遊熱點o既地方，戀海草原。

一望無際o既景呀！

加上一大片草原！

我地忍唔住即刻坐低影相

我仲訓埋係草地 (再講一次，其實我係想扮個d好有feel訓係度o既相，但影出來比人話似死屍)

呢張效果會唔會好d呢？

來到草地，又點可以唔影跳躍相！好想用五十年不變來形容我地！

不知怎的，很喜歡這一張相。