[游记]20061024成都,九寨沟,黄龙,.

January 02

20061024 成都,九寨溝,黃龍,樂山,峨眉 (Chengdu, Jiuzhaigou, Huanglong, Leshan and Emei) 下集

到達機場後天剛亮，原來那對印尼華僑夫婦團友話漏左部相機響酒店果度，導遊領隊打過電話返酒店問，酒店方面都話見唔到，就算那夫婦說要報公安，酒店方面仍然都係話搵唔到。相信導遊領隊都有信心可以說服佢地上機，所以一早就將佢地兩個既行李check in左，但唔知係果部相機對果兩個團友好有紀念價值，定係為左一時之氣，果兩位團友竟然決定離隊，自行返酒店算賬！

最後除左領隊之外，我地全部人已經上晒機，突然響窗口望見領隊同女團友向飛機行過泥，我地以為最後都說服到佢地上機，點知之後先知道佢地係想拎返件行李，不過由於倉裡面行李太多，佢地都係搵唔到．．．於是呢個離隊事件就成為呢個團之後既主要話題，不過領隊就慘啦，要知道團友離隊對旅行團泥講係一件大事，再加上果度係響海拔三千米以上，天寒地凍，人生路不熟，行李又寄左倉，對兩位五十歲以上既人泥講的確係幾危險，所以領隊之後都要不斷講電話向各方面交待同處理呢件事件。

唔洗一個鐘後平安返到成都機場，不過就少左兩個團友，大家都圍繞住兩位離隊團友既事情而繼續討論。之後由成都大約坐左兩個鐘車就到左樂山市，跟住就食午飯，呢一餐係呢果團第一個響市區食既飯，以樂山有名既豆腐為主題，唔知係咪廣東人做廚師，所以口味都好適合我地，整體上尤其是豆腐，都很好味。

餐廳出面就係碼頭，所有遊船都係以對出不遠既樂山大佛為目的地。遊船開出後只要大概十分鐘就到樂山大佛前，第一次經過時船開得好快，一貶眼就過左大佛，原來遊船係回頭時先會響大佛前停定，大家都趕緊影相。大佛雖然經過千幾年風雨侵蝕，但仍然好完整，亦感到其宏偉。不過遊船都只不過係停左大約十幾分鐘就要回程，所以影完相都無時間仔細欣賞。臨到岸時回望遠處可以見到自然生成既睡佛，不過多年後睡佛已經不太似，再加上煙霞大，所以效果不太好。不過點解睡佛上有座塔？起響果個位置究竟代表乜？

話咁快唔洗一個鐘就遊完樂山大佛，之後再坐大概一個鐘就到峨眉，不過到達後開始有d雨。宜家既峨眉山已經係一個佛教聖地，全個地區有幾千間寺廟，而峨眉派亦都早已絕跡，所以好可惜見唔到峨眉派既劍法同弟子。我地首先到當地最有名既寺廟報國寺，去得太多寺廟所以都唔覺得特別有吸引之處。之後就返左酒店，間酒店真係相當唔錯，辛苦左咁多日終於可以嘆下，可惜冇乜時間試下果度既溫泉，因為睇介紹好似都唔錯。果晚食完飯都有出去行下，不過最衰就係落雨，所以都係出左去兜個圈，影下夜景咁。

第二朝食完早餐再出發，響酒店門口就可以坐環保車上山，個司機簡直想創出上山段最快圈速咁，逢車過車，響d之字型既路上面貼住坑渠蓋咁轉，坐到d師奶暈晒車浪，我坐響最頭就更加有feel，不過響最尾段都係敵不過睡魔．．．

環保車並唔係上到頂，仲要坐多一段吊車先到。呢段吊車最驚險處竟然係上落吊車既時候，因為架吊車好細，只可容納兩個"正常"人坐，個門口就更加係奇窄，而且上落既時候吊車係唔會停，所以上落吊車的確有一定既難度。無驚無險落左吊車，要再行多十五分鐘先到山頂，途中有好多揹住一大籮石仔既苦力，每日都係咁揹，但係得果一百幾十蚊真係好辛苦。最後終於上到頂，果度有剛剛零六年頭先起好既四面十方普賢佛像，仲有後面既大雄寶殿同金頂，都係金光閃閃，非常搶眼。雖然見唔到峨眉四絕，但係可以響金頂後遠望見到遠處既萬佛閣同後面連綿既山峰，感覺好有氣勢。

響山上食完飯後，就搭返吊車落去，之後就再行左一段山，原本話實見到d好餵食好貪玩既馬騮，點知都係見唔到。之後環保巴士司機又係要創下山段既最快圈速，話咁快就落到山。完成峨眉既行程，又要返去最後一站成都，先到必去景點寶樹堂，食完飯後就到錦里一條街行，呢條仿古街做得唔錯，可以見到好多古時既舖頭攤當小食等。行完就返酒店休息。

最後一日先到動物園睇熊貓，真係好kawaii呢，尤其是個背脊，肥得得好鬼cute。不過佢地就真係好嘆，攤響度係咁食，食完就訓，唔怪得會咁肥。之後見團友都有興趣，就特別加插欣賞埋各種唔同特色既馬騮，有d都真係幾得意架。

去完動物園就去左蠶絲店，之後就食左餐三國宴，每樣餸既名都同三國演義有關，非常特別，仲好好味，我地仲要加個水煮魚，成盤辣椒，真係好嚇人。最後去埋青羊宮道觀，仲見到好多成都人響果度嘆茶，真係好優閒。最後最後去到機場，又見返果兩位離左隊既團友，再次聽到好多果兩位團友同領隊既恩恩怨怨，實在不能盡錄，總之就一定夠各團友記一世啦。

呀，終於寫完呢篇遊記，仲有黃山篇，請密切留意。