[游记]老sell游记:三关过后

老sell遊記

三十出頭, 大唔透. 家在香港仔, 心繫南區. 無所事事, 嗜好繁多. 飲飲食食, 快樂到極. 好奇心大唔代表創意高, 心思思又又唔代表主意多. 鍾意同人傾偈, 但又怕有自己講而無人地講.

十二月 02, 2007

三關過後

今朝一早肥龍約好友人喺香港站等, 坐早上5:35分(首班港鐵)特別班次直飛向迪士尼進發.

大鄉里肥龍初次踏足迪士尼, 對賽事路面情況一無所知, 只相信唔會好多斜路(因為填海關係架嘛...), 估計應該唔難應付. 上次Nike十公里路程有上有落, 結果可以58分鐘完成. 今次再以練習心情去面對, 希望保持上次時間, 目標鎖定一小時內完成.

放好行李, 熱好身. 企喺起點, 準備起步. 首四公里一直保持大約五分鐘跑完一公里, 可以話幾順利. 不過跑到第五公里時, 左邊腩部突然覺得好痛, 痛到差不多想停低抖抖, 於是放慢腳步試試休息回氣, 結果再跑五百米左右後又無再痛苦, 又可以發力再衝過.

到達迪欣湖, 先知道原來都幾大, 腦裡就開始諗要跑幾耐先可以跑一圈. 另外因為已經完成咗一半, 可能風景優美, 竟然跑到有啲迷茫. 不過只係過咗一陣, 又俾旁邊工作人員既打氣聲吸引返到賽事上面.

迪欣湖後路段微微落斜, 可以一路回氣一路調節步速. 跑到最後一公里, 時間約為48:xx:xx, 如果以均速計算, 大概該可以比上次快既時間完成. 結果都唔理沿海優美風景咁多, 搏埋啖氣去衝過終點, 最後以約54分鐘衝線.

目標超額完成! Yeah!

肥龍三關過後, 黎個小結:

(一) AVOHK五公里短跑: 30 分鐘
(二) NIKE十公里跑: 58 分鐘
(三) UNICEF十公里跑: 54 分鐘

之後目標及焦點就係明年二月十七日既渣打(半)馬拉松! Go!Go!Go!

後記: 後來衝線過後, 喺終點附近見到一個著淺藍色運動衫同著深色襪同跑鞋既索女. 不過肥龍啱啱跑完索哂氣覺得未係時候即刻食檸檬, 最後決定無上前打招呼及相認. 拿咁啦, 肥龍就係著住呢件衫跑架啦, 哈哈! 不過索女都好叻, 跑咗三年, 一路有進步! 三點成績除咗一年比一年進步兼效率高, 跑完一陣已經有文出. 認真厲害!

又後記: 初次踏足迪士尼, 欣澳, 迪欣湖感覺唔錯, 而且都幾舒服. 之前好多人講既(負面)評語肥龍又唔覺喎! 果然眼見為實又一例證!

張貼者 南區肥龍 位於 星期日, 十二月 02, 2007

5 意見: Old Cake 提到...

龍哥,
恭喜哂呀! ^_^
你快過上次比賽成四分鐘咁多喎 厲害呀

2007年12月02日 星期日 下午10:58 xiao zhu 提到...

超額完成點樣獎勵自己呀?

2007年12月03日 星期一 上午12:37 桃紅三點式 提到...

-->左邊腩部突然覺得好痛

好搞笑咁你渣打係咪報左半馬呢我估我未必跑到今次成績因為我今次已經辛苦到想死同埋東廊有大斜路應該會辛苦

我都覺得中途好鬼迷茫極度眼訓好彩我隨身帶左枝細白花油搽左兩次先捱到終點

2007年12月03日 星期一 下午3:42 s-pig 提到...

跑步都有艷遇,真係好!

2007年12月03日 星期一 下午10:22 南區肥龍 提到...

old cake,

多謝哂!
多得大家既支持, 加埋練習, 咪得咗囉! ^^

燒豬,

點樣獎勵自己呢!!? 其實真係未諗過喎, 嗯,我諗會唔戒口去食番幾日美味食物先, 不過個肚呢...千祈唔好超額完成囉...(最多跟住再練過呀^^)

三點,

果然優雅呀~~~(死, 我又想唱歌添!)

係呀~我已經報左渣打半馬咧! 又如果唔係因為半馬, 近排都唔駛猛練, 不過好enjoy既!

其實你唔駛驚辛苦吖, 你今次跑個時間唔錯呀! 不過除咗東廊大斜路, 到時應該仲會塞人, 咁咪乘機回氣抖抖, 等有機會再衝啦! 加油呀!

s-pig,

呢啲就係影響臨場發揮既動力咧! ^^

2007年12月03日 星期一 下午10:56

張貼意見

較新的文章較舊的文章首頁

訂閱 張貼意見 (Atom)

停一停值得讀