[游记]珠海为食之行

首先默哀3秒钟，寻晚写咗成个钟既嘢，点知死机，搞到今日要写过。阿门～

好～咁可以开始啦。

前一段时间去咗珠海为食，将行程写落黎，方便各位为食友参考。

一般去珠海有好多车可以做，一般朋友就可以去越秀南车站或者各大客运站豪华空调大巴约50－60蚊一个人。如果係中大既朋友，唔使讲，梗係去南门坐30蚊位既歧关车啦。

大约90分钟车程就可以去到珠海啦。第一站我係选择唐家镇啦。（如果无办边防证既朋友响边检站办完证都可以直接搭公交车过去唐家。）

【唐家镇·野生菌 / 乞丐鸡 / 唐家鸡粥】

由于坐中大既车，所以我就干脆坐到唐家镇中大珠海校区落车啦，随便睇睇珠海校区既风景。然后就去唐家镇揾嘢食。

响唐家商业街对面（唐家医院，聚龙酒店对面）有一档野生菌，由于係我离开珠海果年开既，一直想帮衬都无机会，所以今次黎我就去试试。

呢间嘢价钱算中等啦，不过招呼唔错，点菜果时会好详细咁推荐每一种菇菌既功效，然后会按你既分量推荐你各种档次既菇菌。当然你要睇住自己个荷包点，唔好俾靓女哦多几嘢就晕晒浪啦。上菜之后全程佢都会帮你漉好分埋，完全唔使自己郁手漉嘢，真係几周到。
另外一提既係呢度既红茶，佢话好似係重庆红茶（如果无记错既话），口感同味道都好特别。当然好唔好饮就视乎各位口味啦。

如果係正餐，大家仲可以选择呢度既乞丐鸡。位置係唐家商业街入去，见到第一个丁字路口（转弯角有家饼屋），右转就会见到好大个招牌嘎啦。都几有特色，味道都唔错。

如果係消夜，我就首推呢度既唐家鸡粥啦。就係唐家医院对面。一锅鸡粥，一碟炒粉，一份萝卜干炒蛋。风味一流！
而且唐家呢度D海鲜都唔错，大家都可以试试。

吃饱饱中午餐，储足能量就可以继续为食之行啦。想唐家医院门口有个车站，去市区首推10号车。当然如果你想游吓珠海，建议你顺便记记3号车既路线方便转车。珠海公交车车费一般车2蚊，空调车3蚊左右。

【拱北·“日之船”墨鱼丸】

做10号车大概40分钟车程就可以去到拱北。呢个钟数係时候去吃下午点心啦。我就热切推荐你去试试拱北呢间“日之船·墨鱼丸”。
（位置：拱北万佳百货落车然后对面M记旁边果条路入去）

3蚊一盒墨鱼丸，绝对唔係你响广州一般街边档吃得到既味道。我试过唔少墨鱼丸档，都同呢间无得比。主要係佢用料好足，丸子里面块墨鱼又大块又爽口，口感同味道一流啊！吃完之后你就唔会吃得惯广州街边D墨鱼丸档嘎啦。我每次黎珠海，只要有时间一定会去整返一两盒吃。
不过呢度D墨鱼丸要趁热食，冻咗就无咁好味嘎啦，所以如果有人排队果时买就最好，包新鲜滚热辣。另外注意呢档嘢下午2点左右先开档，唔好太早去摸门钉啊。
视乎个人口味可以选择加唔加芥辣。我个人中意落少少，滋味好多。

另外有时间可以响附近发掘一下，珠海D葡挞都唔错嘎。可以试试。

【湾仔·海产市场 / 海鲜街】

拿住几盒（？！！）墨鱼丸去返万佳对面个公交车站就可以搭30号车去丸仔啦。大概30分钟车程就到。（一路坐车一路叹墨鱼丸）

湾仔离澳门只有一河之隔，可以遥望澳门。晚黑仲可以观赏澳门夜景。湾仔最出名就係佢个海产市场啦。依家果度整咗个微缩澳门街，隔离就係干货市场。里面好多干货买，后生仔为食猫可以买D鱿鱼丝、九肚鱼、龙头鱼之类既即食零食。或者可以买D干货返屋企煲汤。
据呢度相熟既老板讲，干货市场其实D货源都差唔多，所以即管择价而购就得嘎啦。另外呢度好多嘢可以随便试食。如果你唔介意，可以每档试D，试匀佢，然后吃饱拍拍手就走。此外买嘢记得讲价，好似鱿鱼丝，九肚鱼呢D嘢，10－15蚊斤左右价位就有交易，唔好买贵嘢啊。

干货市场响来程方向行返少少，响公交车总站对面有条街入去就係海鲜街。可以响果度买D海鲜，然后揾旁边任何一间大排档加工。不过其实价钱唔算非常抵（你特别识得讲价除外），但係胜在够晒新鲜。不过鉴于响度吃过几次啦，所以今次无响呢度吃。

【唐家镇叠石·食神海鲜城】

响果度坐返公交车返去，可以选择去拱北或者香洲车站转10号车，（如果要返广州，呢两个地方都有车搭返去），或者凤凰北坐3号车。然后去叠石站落，就可以去到珠海著名既食神海鲜城啦。（注意，呢附近两间好出名既餐厅，叠石餐厅响鸡山站，食神餐厅响叠石站。好CONFUSE嘎。）

食神餐厅虽然位置咁偏，但係睇门口车场果堆车就知道佢来头唔少。里面环境非常正。坐落小食餐具都好讲究，可能大家会担心价钱问题。不过黎呢度识食精明既为食猫梗係要做到抵夹正啦。所以我推荐两个菜。

第一个就係“珠海第一蚝”，黎到食神梗係要试试佢既招牌兹士锔蚝啦。5蚊一只，由于兹士比较漏，一个人大概2－3只就够嘎啦。唔好眼阔肚窄，宁愿唔够再加。浓郁既兹士包住鲜嫩既生蚝，味道一绝。呢度D兹士落得好够料，所以味道比好多其他地方都好。

另外再上一个“茄子伊面”，被誉为食神最抵食既一味菜。18蚊一大盘，味道仲好正添。如果3，4个人既话食完呢两样，加多道菜就已经够晒嘎啦。

当然食神既蛋挞都好正好好味，吃饱想黎多个甜品既话就首推呢样啦。

吃饱之后就可以坐返公交车去中大坐歧关车返广州啦。不过歧关车经过中大最迟好似係7点半定8点半左右。建议CHECK清楚时间表，唔好误咗时刻。

另外如果有米既朋友当然可以住多晚先走，逛吓情人路，游吓珠海。或者去浸吓御温泉（香洲车站坐609最后一班车晚黑8点）啦。另外拱北既石头烧，香洲既各式食店都唔错，有机会都可以到处为食一下。