[游记]#151——伦敦游记—第三日(28/12/06)

(上回講到: 第二日去咗泰特現代藝術館, 倫敦橋等等名勝地方....)

第三日, 諗住先係 B&B 食早餐然後展開一日嘅節目, 點知落到 breakfast room 話我哋太遲喇, 冇早餐供應喇. 當時只係朝早九點十五分左右: 原來早餐時間只係由 07:30 am~09:00 am, 好短時間呀, 痴線 !! 唯有返上房, 食尋日喺超級市場買嘅嘢食, 然後再出發啦 !!

今日首先要去嘅地方, 就係大英博物館 (The British Museum). 搭地鐵去到 Tottenham Court Road 站落車 (其實都可以喺 Holborn 站或者 Russell Square 站落車都得, 三個站都係行 10 分鐘左右), 再行一陣就見到喇. 上圖: 話晒大英博物館係遊客區, 所以有好多呢類精品 / 手工藝品店喺附近. 上兩圖: 大英博物館正門一覽 上三圖: 入到去 main hall, 地方真係好好好好大; 天花板有一個大天幕.

大英博物館分咗好多唔同嘅展區, 例如非洲區, 亞洲區, 美洲區, 歐洲區唔同嘅洲份; 再細分唔同嘅國家展區, 例如中國區, 日本區, 埃及區, 希臘區及英國區等等.... 要認真行完 & 每一個展品研究晒, 我諗一日都未必夠 !! 上三圖: 非洲展區 上兩圖: 希臘展區 上四圖: 埃及展區 上三圖: 如果冇記錯, 應該係美洲區 (太多喇, 點記得晒 ?!) 上圖: 英國展區 上圖: 亞洲展區 上圖: 日本展區, 連動畫文化都有提及. 好似圖中所見嘅小飛俠同埋高達. 上圖: 錢幣歷史區, 連最繁忙嘅冥通銀行都有介紹 !! 陰司紙呀 !!!!!!!! 上兩圖: 都係錢幣歷史區; 香港嘅錢幣歷史都有介紹 !!

經過幾個鐘頭喺大英博物館, 睇都睇到麻木晒, 唔經唔覺有到 lunch time 喇. 搭地鐵去咗 Covent Garden 站預備下一個節目: 食午餐 !! 去咗一間英國傳統啲嘅 bar 食, 我同家姐叫咗一個炸魚著條 & 一個肉批 share 食 (兩樣都係英國著名食物), 好大份量, 好好食啊 !! (睇到相都好掛住啲味道 !!) 之後食完午餐, 再喺 Covent Garden 行咗一陣; 再落一個叫 Seven Dials 嘅購物區. Seven Dials 係由幾條街組成: Earling Street, Monmouth Street, Mercer Street 等等, 有好多年青設計師及新晉歐洲品牌嘅舖頭, 比起一般購物區有特色. 如果去倫敦嘅話, 誠意推介 !! 上圖: 見到一間芝士店. 一舊舊好似 "針板" 嘅都係芝士嚟.

又係個句, 英國冬天真係好快天黑. 下午四點左右已經天黑喇. 跟住去咗世界著名百貨公司 Harrods 幫家姐嘅朋友買嘢 (Harrods 嘅老細, 就係同戴安娜皇妃一齊車禍身亡嘅男朋友多迪嘅爸爸; 同時係富咸球會嘅老細----著名埃及大亨艾法耶茲喇.) 由於仲係 Christmas sale period, Harrods 入面多人到癲, 同喺年三十晚維園行花市差唔多咁多人 (可能誇張咗啲, 但所差無幾 !!) 入到去超迫 & 超熱, 真係冇乜心機行, 求其買完嘢即刻走喇. 上圖: Harrods 外貌

今晚晚餐係返 B&B 食自製 "雞肉芝士牛角包 " & 腸仔卷, 之後瞓喇 zzzzzz..... (待續....)

新增回應