[游记]天水围(靓靓秘书日记)

天水圍

| 09-Feb-06, 9:36 AM | 生活記敍 | (163 Reads)

尋晚同老公去左兩個住天水圍o既朋友屋企拜年。

我地先去中尤屋企，佢帶埋BB落黎接我地，BB好可愛呀！不過其實BB一出世o個陣係唔足月架，佢o個陣訓左幾個月醫院呀，好彩係政府醫院咋，如果唔係條數都幾kum計... 上到佢屋企，就即刻開飯啦，o的送係佢地個工人煮o既，都OK啦！食完飯，我地o係度欣嘗佢o的音響，真係好正呀！佢有套5.1，出o的聲出黎真係好有震撼架，老公又好似心郁郁，唯有睇下有無人買新機，部舊機就賣俾我地啦...

我地九點幾就離開中尤屋企，搭輕鐵去阿忠屋企(本來中尤話車我地去，不過佢唔記得帶鎖匙)，我地裝左地圖o係部PDA度，唔駛問人就識得點去啦，真係好方便！一去到有好好飲o既陳皮魚豬展湯，好好飲，好鮮味呀！佢煲左三個鐘，我都未試過煲湯煲咁耐，佢又教我地點煲，真係要搵次試下煲至得！飲完湯，佢地就飲啤酒，阿忠又整左o的蒸魷魚出黎又係勁好味呀！不過膽固醇好高，都係少食為妙。我地走o個陣已經係11:30，行出去搭輕鐵返屯門，個輕鐵站大風到個人都吹得郁呀，仲要等八分鐘喎，好辛苦呀！返到屋企12:00啦，但係我又想幫老公裝返個字典同埋Scrabble落部PDA度，file size好大，搞到3:00至訓呀，依家沖o的花旗參茶歎下先！