[游记]菩提迦耶游记二之菩提迦耶机场

GAYA 舊機場外觀 (圖中男士是來接機的PEMA)

從上遠看GAYA舊機場.. 好原始

從機上遠看未起好的GAYA新機場..好典雅

話說我地delay左班機一日之後, 終於大霧散去, 可以接我地去gaya喇, 但係去到機場, 仍然係一遍混亂, 四圍搵人比機票我地入去, 結果有個manager出黎, 帶住我地成行人連行李車入去, 囉到boarding pass, 寄好行李, 唔知搞乜鬼叫我地去移民局! 我搭內陸機喎, 做乜又要我出境!? 左推右推, 行到埋去, 佢都問我做乜黎哩度, 我話, 我點知, 我又唔係出境! 跟住呀manager又出黎, 又一輪混亂, 帶我地行另一條路, 上去候機室, 經過一輪搜身, 就等上機. 候機室有一個電話, 但唔係入錢果種, 係有"專人"服侍果種, 同你計時打左幾耐然後收錢. 仲有個類似電話亭物體, 原來係比工作人員入去, 宣佈...xxx班機, 可以上機喇~

響印度, 每一個機場都保安深嚴, 門口有荷槍實彈的保安, 你要出示機票方才可以入去, 送機者一律行開. 入門口未到counter前第一件事已經係將行李過x-ray.

check-in左, 假若你順利過到移民局又唔使比人屈錢, 就要去搜身, 男有男搜, 女有女搜! 手提行李當然要過機. 人就入房, 拉埋簾, 就有位好NICE的機場人員同你搜身, 首先用金屬探測棒, 掃暈全身, 響的話當然要研究一下係咩事. 通過之後, 就會響你登機証上面蓋一個大印, 記得一定要有哩個印 (不過小心油未乾會甩色), 唔係上機前冇哩個印你就又要搜一次! 搜完身, 就要去拎返件手提行李, 如果入面有電器, 或者佢覺得可疑物品, 就要打開比佢睇(眼見十個有九個都要開袋比佢搜, 除非你冇手提行李, 所以聽聞一般旅行社會叫團友不要帶手提行李上機, 有朋友話, 連包九制陳皮都要試食比佢睇!) . 若果係電器, 就要試比佢睇, eg, 電筒要照下, 相機要影下, 鬚刨就刮兩下佢睇啦. 証明佢真係一件電器! pass之後, 手提行李上會掛一個行李牌, 關員會同你蓋印, 証明搜左. 臨上機前, 睇下果 日班機有冇delay, 時間夠唔夠, 有可能仍然要男女各搜一次身, 同埋睇下你個手提行李個牌有冇印, 冇又搜過. 不過你放心, 你響機場係唔會有機會shopping, 因為...個機場根本乜鬼都冇! 即係十幾廿年前個長州碼頭咁囉~

基本上, GAYA機場唔可以話係一個機場, 佢唔可以話有跑道, 只有一塊泥地, 一間平房上面坐滿來看熱鬧(睇飛機)的平民們.唔好諗佢合唔合格喇, 降落左就算. GAYA唔係大城市, 每年只係冬季幾個月有人黎, 因為夏天成40幾度, 所有人都會走哂, 一個死城咁. 由機場出黎, 要經過好多關卡, 聽聞哩度本來係軍用機場, 最近至開放......... GAYA機場一星期唔係好多機上落, 佢冇電腦系統, 冇電視顯示航班有冇delay或者幾點到, 甚至唔會有塊黑板有專人寫航班資料, 因為一星期得果三幾隻機, 所有資料都已經刻左響告示版! 唔使改! 方便! 不過聽聞新機場大樓(嘿嘿....) 已經啟用, 可能有改善卦...落到黎, 得我地一班機, 可能因為係特別班機, 機場人員都有d不知所措, 又要我地去移民局, 我地當然全機人擾攘, 我地尋晚咪入左境囉! 內陸機入乜鬼野境啫! 終於, 機場manager又出現, 擺平左移民局, 叫我地去等行李. sorry, 唔係去行李帶, 果條唯一一條行李帶唔知做乜唔用, 叫我地一齊出去停機坪, 搵返自己件行李! 但係囉完, 一定要show返個baggage label, 証明件野係你, 咁你至走得! 你話d保安幾咁嚴緊呢!

超過24小時, 我地終於來到GAYA! 由機場到BODHGAYA, 只係十五分鐘車程, 師傅一早已經安排好車及他的司機來接我們, 9個人, 件件行李都超重咁濟, 但係D印度人好輕易就把每一件行李傳上車頂, 一一扎好, 開車!

新增回應