[游记]国际赛马日沙田马场游记

琴日係2007年國泰航空國際賽馬日，所以特登帶咗屋企個女人去行咗個大運．

由於我都係第二次上，加上對上一次去已經係N年前，而我又唔賭馬嘅，所以只係當旅行咁去．可能琴日係國際賽日，特別多人去捧場兼幫手鋪草皮，去到個馬匹亮相圈，人山人海，又勁多人食煙，真係迫到個肺都爛咁滯．不過D馬仔隻隻都嬴過吓D咩世界賽呀，一級賽呀咁，果然台型有番咁上下(雖然我唔識睇)～不過碧咸靚仔過歐偉倫我都係識分嘅～

其實沙田馬場都真係幾靚，又應聲喎，都D馬跑到仲剩番400米到終點嗰陣，看台D人就開始由左至右大叫，為自己買咗嗰隻馬打氣．一過終點嗰刻，看台上大部份人仲會一齊講同一個字嘅粗口，為自己輸嘅幾十蚊出番口氣．都幾震撼o架，唔好講笑
至於我，一場黎到，點都要玩番兩手嘅．不過兩條友又唔識買，又唔識路，於是決定拎幾十蚊出黎買是日焦點賽事"國泰航空香港盃"，其實主要原因係因為嗰場得7隻馬出賽，我地決定每人選隻，串埋佢．諗住7隻馬買咗3隻，唔中都抵死丫．
選好之後我地行到去個counter見到冇乜人，諗住冇乜人，唔洗排隊咁正，點知．．．"兩位，呢個counter最低要買$1000，您地唔該上樓上嗰層丫"，於是我地就拎$80上咗樓上囉．．．(魚皮爆)

買完之後我地再出番看台等開跑，我睇下佢張飛係1號，3號同7號．忽然旁述突然講咗句"7號係今場全場最冷嗰隻"．．．(我即刻O曬咀)．．．"您亂督o架?"，"唔係不過佢個名好聽丫ma"．．．
之後無耐就開跑喇，今場真係特別刺激呀～最後嘅賽果仲要係"1"，"3"，"7"！！！！！！！
真係比個付碌精買中咗！！！！！！

好開心收完少少錢之後我地就等睇煙火喇～
魚翅拎曬員工D醫療津貼黎放"火"，我梗要捧吓場啦，為今日去咗參加遊行嘅家姐壯行色～
喺警察銀樂隊表演完之後，煙火隨即發放，我同女人因為霸咗靚位，所以煙火忽就晃好似係我地面前爆到柒彩咁，都真係幾鬼靚o架～

可能08年魚翅會扣咁D crew嘅allowance，再比馬會做國際賽獎金或者下次會放煙花唔係放煙火咁少嘢～