[游记]希腊,义大利之行

今日我哋要去梵諦岡,又要搭地鉄,真係要萬分小心,又無落雨,但背囊照落raincover上車,隻手都掂住錢包.

去到聖彼得廣場,果度非常多人,行前D睇吓,原來好遠果度教宗本篤十六世講緊道,道理我當然聽得明啦,淨係唔明佢講啲義大利話,見咁好機會,緊係要同佢影返張相啦...........個screen! 教宗講咗成20幾分鐘,我地就行咗去梵諦岡博物館,入場時都好多人排隊,排咗成30mins.先入到去,入面多Q大,行極都未行完,不過都值得,雖然我唔識藝術,但入面D藝術品真係好靚,足足行咗兩個幾鐘,比十幾歐羅都值! 到三點幾先食飯,D餐廳都幾貴,我哋去咗一間好似快餐店嘅物體食咗一個飯,一個意粉,一件pizza,一杯可樂,結果要成三十幾歐羅,真係想嘔返比佢當無食過,淨係杯汽水都要4蚊euro,你估自己係半島咩! 跟住我哋行返去聖彼得廣場,點知見到好多人排隊,我哋問咗一pair香港人問佢哋排乜,佢哋話排隊入去教堂,乜可以入呀咩,點解我唔知嘅?

跟住我哋就排埋一份,排咗成個鐘,當時又落雨,仲有D鬼佬想打尖,比我用有限嘅英文叫返佢哋去排隊,過完金屬探測器後終於入到去啦,一入到去,震咗一震,唔係急尿,係入面太靚啦,又估佢唔到咁大,入面D藝術品比博物館更靚,真係靚到唔識講,入面仲有人做緊彌撒,好莊嚴呀,一個唔係教徒嘅我都咁興奮,難怪羅蘭咁開心啦!如果叫我比200蚊再入去我都制! 有過今日lunch嘅經驗,今晚都係在酒店附近買咗兩件pizza食算啦,都係3蚊歐羅咋!

新增回應