[游记]2007东京游记(第五天)hk.myblog.yahoo.com/georgengai917

開心時光過得特別快
眨下眼已經係日本行程最後一日啦

Day 5 新宿 > 上野 > 東京成田機場 > 香港

今朝唔駛好早起身, 因為冇特別地方去, 只係要去上野買手信番香港, 我地八點check out, 跟住拖住兩大件行李去食早餐, 今次我地食烏東同埋鯖魚定食 食完早餐, 又要出發啦, 我地目的地係上野, 搭山手線就可以去到啦
去到上野, 為免行李阻礙行街心情所以我地就去到京成上野駅, 嗰度有好多投幣儲物櫃, 收費由容量決定(100円-800円), 可以擺24小時, 而我就用800円的king size
買手信嘅地方喺京成上野駅隔離, 過條馬路就係 喺呢度買野有好多種類, 你可以去日式超市一次過買晒D手信, 其中嗰間二木の菓子比較出名, 款式多價錢合理
呢咋就係戰利品, 不過大部份喺另一間叫中谷商店買嘅 買完手信, 就喺鉄火丼食刺身飯, 價錢唔貴, 刺身好新鮮, 但係唔係好啱我口味, 因為將生勾勾嘅刺身放喺熱飯上面, 跟住攪勻一齊食, 唔係好慣(食壽司又唔會咁喎) 食完野, 差唔多要去機場, 我地喺京成上野站上車, 我地冇搭Skyliner, 因為貴(1920円), 搭京成本線(1000円), 但係時間耐D(約1小時20分)同埋冇指定位置, 不過我搭嘅時候冇乜人, 大把位坐, 五日行程就咁完啦, 拜拜
喺日本街頭成日有好多野派, 紙巾啦, file folder, 甚至連寫真集都有呀