[游记]越南游记

哈哈~ 我都知大家等我既遊記等左好耐架喇！耐到我都有d唔記得果幾日做過d咩喇！哈哈！好彩我位團友係佢自己個blog寫低左d行程jer！咁我可以照住寫，哈哈！唔記得既就... 放多兩張相頂住算數啦！哈哈哈哈哈哈哈~ 好！HEA到不得了既越南之旅出發喇！

今朝六點九我地就要到機場集合喇！天呀！我尋晚十點先係呢個機場走咋... 好辛苦呀... 所以我都累到唔想講野咁濟，好彩今次係自己去玩，咁樣個心情先好D咋！一上機... 唔好意思喇團友，我真係超累，要訓一陣先喇！你自己玩住手指先啦！有咩轉頭再傾啦！哈哈！

兩個半小時之後，我地既飛機就緩緩咁抵達胡志明機場喇！越南人既生活真係好悠閒啦！所以... 咩都慢過人架！過關既時候，每條隊都係得果十幾個人jer，但我地就等左半個鐘以上，天呀！有無咁慢呀....

我地終於正式係胡志明登錄喇！好！上車！架旅遊巴好大呀！計埋我地都係得十八個團友，真係一人坐兩個位都仲得呀！呵呵！唔理咁多，揀個靚位先！哈哈！第一次坐旅遊巴可以將個椅背挨到最低啦！正！呵呵！

( 見唔見到後面角落頭果個叔叔呀?佢同佢太太都好好笑架！我地四個會長期鬥無聊啦！哈哈！)

大概一個鐘既車程，我地就黎到胡志明既市中心既「聖母大教堂」同「百年郵政大樓」喇！

遊覽完兩座咁靚同咁古典既建築物之後，我地就去Diamond Plaza食晏喇！係越南使錢真係好開心啦！下下都萬萬聲咁使，好豪呀！我地使VND59,000買左下面呢D野食啦！(即係大約HKD30，好抵呀！)都幾好食架！

食飽飽之後，我地就開車去頭頓市喇！去到既時候都已經係四點幾喇！咁辛苦黎到，不如坐低飲杯野先啦！越南好興飲滴溜咖啡架，但我諗呢個玩意都係比較岩越南人啦！慢慢坐慢慢歎！不過呢度個view都算ok架！

飲完野之後，領隊就帶我地去坐三輪車睇日落喇！不過... 會唔會已經晏左D呢？天都黑齊喇喎！日落就睇唔到喇！我只係睇到架三輪車係馬路上面亂衝亂撞jer... 好驚呀...

我地飛完三輪車之後，就去食晚飯lu！呢餐飯都算幾好食啦！我地仲試左呢度既檸檬梳打加糖tim！都幾得意架！

食完飯之後，我地就去左頭頓所謂既夜市，不過真係無咩行啦！所以都唔夠半個鐘，所有團友都已經上返車等返酒店喇！

今晚既酒店真係... 因為頭頓係屬於離島區，所以d酒店真係好有離島feel，唔知真係以為自己去左長洲啦！不過報團既時候已經一早講左咋，唔係可能我會衝出去打個領隊一身啦！哈哈！

呢度夜晚真係咩都無得玩啦！好彩我地都醒目，有帶NDS黎咋！哈哈！打一陣機，訓覺！